O obxectivo destas axudas é dar cobertura ás prestacións básicas de servizos sociais, como a atención á dependencia ou o proxecto para o desenvolvemento do pobo xitano
11 de agosto de 2009.- A Consellería de Traballo e Benestar vén de incrementar o crédito á hora de cofinanciar aos concellos na prestación dos servizos sociais. O obxectivo é axudalos nestes momentos de crise económica, que asfixia especialmente ás corporacións locais.
Con estas medidas, a Consellería dá resposta a diversas liñas de actuación. En concreto, estas subvencións serven para dar cobertura ás prestacións básicas de servizos sociais, como o proxecto de atención á dependencia, o proxecto de desenvolvemento do pobo xitano, e o primeiro nivel de atención a sectores da poboación co problemáticas diferenciais.
Ademais, estas axudas ofrecen estabilidade aos traballadores e aos programas de servizos sociais, ao tempo que fomentan estes servizos nos concellos galegos e promoven os investimentos municipais en materia social en Galicia.
Deste xeito, o departamento autonómico ampliou en 3,1 millóns o crédito destinado a estas subvencións. A Consellería tamén modificou a orde que regula estas axudas, de modo que agora permite o anticipo do 100 por cen da subvención para gastos correntes, sempre que o Goberno local aporte o 6 por cento ou máis do orzamento proposto.
Tamén se estableceu un incremento da porcentaxe dos pagamentos a conta, para poder ofertar aos concellos a dispoñibilidade financieira precisa para facer fronte á prestación destes servizos, máxime nesta situación de crise económica, dirixidos aos sectores da poboación máis desfavorecidos.
Así, o Goberno galego anticipará o 100 por cen da subvención para gastos correntes, no momento do seu outorgamento, cando o Concello cofinancie, como mínimo, o 6 por cento do orzamento total proposto. Nos anos anteriores, autorizábase un anticipo superior ao 10 por cento.
Nos casos nos que os Gobernos municipais non acaden esta porcentaxe do 6 por cento, poderán realizarse pagamentos a conta de ata o cen por cen, cando ata o de agora só chegaba ao 80 por cento. No que se refire ás subvencións destinadas a financiar os investimentos de capital en materia de servizos sociais, tamén se realizarán pagamentos a conta do 100 por cen da porcentaxe subvencionada, cando nos anos anteriores o límite estaba no 80 por cento.
